المشاركات:n/a

سلامات يا جماعة ..






هاي الصورة من برج بكنيسة بالقدس وطبعا لولا علوه هاد
لما قدرنا نجيب كل هاد فقد ما هو عالي في استراحتين
خلال الطريق لفوق .. بعين الله :D










جزء من القدس مع المصلى الجنوب للاقصى




موقع للتصوير عجبني !




طبعا قبة الصخرة اما هدول اللي لابسين ابيض
هو وفد اجنبي اجت وحدة منهم وصورتنا انبسطت علينا
بس كل وحدة اتصرفت بطريقتها الخاصة اللي حطت يدها ع وجهها وللي ابعدت ووو..





احد تريات قبة الصخرة وشكل التريا ع شكل قبة فن رائع والله ..
اسفة كان ودي اصور للصخرة من الداخل صور اكتر واحلى تكون ..
الا انهم عم برمموا فيها وما قدرت والله
للمرة الجاية ان شاء الله بنشوفها كلنا من غير تصوير (بعيونا) ..





احد زخارف سقف القبة .. اللي بعيدة شوي عن مكان الترميم ..














هاي الصورة اسفة انها غامقة شوي لانها من قلب
المصلى الجنوبي بالاقصى .. (( اللي فيه المنبر))











هاد باب العمود اللي طلعنا منو بعد ما غادرنا الاقصى




احد ساحات الاقصى من عند الصخرة .. (صحن قبة الصخرة )




مدخل الاقصى القديم اللي منعشقو انا والاخت نسوم




هاد قال رحنا نصور انا ومسك الاسلام المكتبة لعيونكم المهم
وانا عم بصور ولا هي مسك مش جنبي طلعت وين راحت البنت .. (خفت تضيع )
ولا هي قاعدة ع مكتب وبتقرأ بكتاب انا والله احترم موقفها
رغم اني انجنيت لانو احنا مش رايحات نقرا قلت تكون
عم تتثقف ولا ابصر شو رحت اشوف شو بتقرأ طلع كتاب ابتسامات..!
وقال بدها تراضيني حكتلي نكتة منهم بتقول ( قال حكموا ع واحد بالاعدام
فقبل ما يعدموا قالولو شو اخر امنية بدك اياها من هالدنيا قلهم اكل
اناناس! قالولوا بس مش هلا موسم الاناناس قلهم مش مشكلة
منستى مش مستعجل
وانا ضحكت .. فهي عرفت انو ضحكتي كانت جبر خاطر لإلها









مدخل المرواني ..



من ارض المرواني وهون كنا قاعدين ومبسوطات
ع حالنا المكان فاضي وماخدات راحتنا اللي نايمة ع السجاد
واللي بتركض وبتعمل سباق واللي بتتجول وبتصور متلي
وللي بتسمع اناشيد
*( وصاحبة القلم الحزين مسلوءة فوق بتستنا فينا)*













حبينا ننهي الرحلة بكنافة عند جعفر .. المهم واحنا قاعدات
هناك اجيت اني بصفتي "نابلسية "بدي اتفلسف
بقلهم اي والله الكنافة النابلسية من عند العكر ولا الاقصى
ولا ابوسير كتير ازكى مش زي هون ولا هي الاخت نسمة بلادي
طلعتلي متل زمور الاشارة وبصوت الانذار بتقول: بنت بيت المقدس
احنا بالقدس مش بنابلس فبلاش فلسفة
.. فانخرست وسكتت عشان تعرفوا اديش انا مسالمة





اما هاي الصورة يا جماعة كان صاحب المحل معصب شكلو ومش
شايف الفضا .. لما شفتو والله خفت بس الحمدلله تجررأت وطلبت
منو انو اصور .. اول ما طلبت منو اعطاني ابتسامة قد الاقصى
وقلي ع حسابك يا عمي ..




طبعا الكل لازم يعرف انو للطاطو او الحيايا او شو بتسموها
بالقدس طعم خاص
فرحنا نشتري ولا الاخت نسمة بلادي اشارت عليي انو اصورهم
.. فكرمالها صورتهم .. وبيني وبينكم الشكل حلو بستحق التصوير








اما شو رأيكم بالهجبل بعجب بلد صح ؟! عبارة عن
الاخضر زعتر والاحمر سماق والاصفر سمسم






من سوق القدس..






سور القدس الشامخ ..




وهاي كتابة الحجة الارهابية نسمة بلادي .. الله يرضى عليها
ونسيت اقلكم انو الجدران والعمدان مليانة ايميلات .. اللي بحب




من سوق السياح وازا بنلاحظ انو صلبان وتماثيل وووو..




طبعا هون مكان شرب للميه وهاد المكان صاحبة القلم الحزين بتحبه




منير صلاح الدين الايوبي اللي دخل تحت حراسة
الاحتلال الاسرائيلي واسفي على ذلك .



من حارات وباحات البلدة القديمة









محل تراث فلسطيني قدام الكنيسة عجبني المحل فصورته
.. من غير ما استأذن صاحبو لاني ما لقيته .. هيك الاخلاق اليوم :S



داخل الكنيسة اللي طلعنا منها للبرج عجبتني عتمتها الزايدة ..



هاد مقطع صغير من الدرج اللي طلعنا لل البرج والله لا يورجيكم
لانو عالي وكل الدرج مدور وصغير حجمو بس
والله كان مقطع من الرحلة روعة ..الله يرضى عليك يا صاحبة القلم الحزين




هاد يا جماعة بعد ما رحنا اشترينا واحنا راجعين ع الاقصى
من احد ابوابه ..ولا هو هاد الفحمة اللي طالع بالصورة
ع الشمال خلى صاحباتي الـ5 يمروا ومسك الاسلام الله
يرضى عليها وقفت جنبي مع انها كانت خايفة
ووقفني انا وعينكم ما تشوف الا النور ..مدلي ايديه التنين
بالعرض وقرب وجهو لحد ما قارب يصدم بوجهي وانا والله
من خوفي (( بس طبعا ما بينت قدامو ) واشكت اخبطو
برجلي اجيبله دوره بس خفت يجيبني بالمسكوبيه ( مركز تحقيق )

فانا طنشتو ومريت من عند طرف ايده
وهو وقتها فقد اعصابه من تطنيشي فقلي وين رايح ..
هو انت من وين ؟؟؟ بالبداية كمان طنشتو المهم بالاخير
سلمت امري لله ورديت عليه قلتلو طبعا من هون قلي
ولا هو بقلي انت مش من هون شو جنسيتك ( قال يعني انا من برا هالبلاد)
المهم بعد ما اقنعتو انو انا من هون وهو لانو حمااااااار مش
مقتنع قلي بدي الهوية قلتلو ما معييييييي هوية
ولا هو شاب شهم والله الله يرضى عليه ويجزي الجنة
( هيك الشباب ولا بلاش ,, هدول امل الامة والله )
اجا وصاح ع الجندي وقلو بتقلك ما معها هوية شو بدك فيها وهو التهى معاه وانا ضليتني
ماشية زي الشطار.. بس انا لهلا ضميري مأنبني
اني ما شكرته ولا ع القليلة الله يجزيك الخير بس كان
الموقف اضطراب وان شاء الله اجرو عند ربي ..

بس الداهية بالموضوع يا جماعة انهم صاحباتي الـ 5 فكروا
الموضوع بسيط وكملوا طريقهم وبنت بيت المقدس محجوزة ..
ولا اجتلكم نسمة بلادي "متل الشجاعة" وقفت جنبي واعطتو نظرة تعجبكم
.. هيك الصداقة وحكت الموضوع طّّول ابصر شو صار معها فاجوا
وقفوا معي وقتها .. بس بعد شو :(..

بس الله يرضى عليها صاحبة القلم كان لو الموضوع كان اصعب من هيك
رح يكون الحل عندها .. وانا بقلها من هون الاجر ان شاء الله وصل

ومن هون بقدم شكري لكل اللي وقف معي .. ولأخواتي الـ 6 اللي وقفوا معي بس بعد شو
وتحيتي لصداقتك مسك ..